قرآن

جب اللہ تعالیٰ کسی چیز پر دوسری چیز کی فضیلت بیان کرتا ہے اور ان دونوں کی اپنی اپنی فضیلت ہوتی ہے تو ایسی صورت میں اللہ تعالیٰ دونوں چیزوں میں مشترک فضیلت کا ذکر کرکے غلط فہمی پیدا کرنے والے بیان سے پرہیز کرتاہے تاکہ کوئی شخص کم فضیلت والی چیز کی مذمت اور حقارت کا وہم وگمان نہ کرنے لگے جیسا کہ یہاں فرمایا: (وَكُلّٗا وَعَدَ ٱللَّهُ ٱلۡحُسۡنَىٰۚ ) اوراللہ نے سب کے ساتھ اچھائی کا وعدہ کیا ہے۔ (السعدی: ۱۹۵)
سوال: مجاہدین اور قاعدین (جہاد میں شرکت نہ کرسکنے والے معذور مسلمانوں) کے ذکر کے بعد اس قول : (وَكُلّٗا وَعَدَ ٱللَّهُ ٱلۡحُسۡنَىٰۚ ) کو لانے کی کیا وجہ ہے؟

اللہ تعالیٰ کے اس بیان میں ایک حالت سے دوسری بلند ترحالت کی طرف منتقل ہونے کی خوش اسلوبی پر غور کیجئے ۔سب سے پہلے مجاہد اور غیر مجاہد کے درمیان برابری کی نفی کی ۔ پھر صراحت کی کہ مجاہد کو گھربیٹھنے والے پر ایک درجہ فضیلت دی گئی ہے ۔ پھر اس مرحلے سے منتقل ہوتے ہوئے مجاہد کو مغفرت، رحمت اور بلند درجات کی فضیلتوں سے نوازنے کا ذکر فرمایا۔ (السعدی: ۱۹۵)
سوال: یہ آیتِ کریمہ مجاہدین کو شوق دلانے کے اسلوب پر مشتمل ہے۔ وہ کیا ہے؟

یہ آیت مکہ کے ان باشندوں کے بارے میں نازل ہوئی جو مکہ میں ر سول اللہ(ﷺ) کی موجودگی کے دوران مسلمان ہوگئے تھے پھر جب آپ (ﷺ)نے مدینہ کی طرف ہجرت کرلی تب بھی یہ اپنی قوم کے ساتھ مکہ ہی میں ٹھہرے رہے۔اس وقت مشرکینِ مکہ انہیں ستانے لگے ۔نتیجہ میں وہ مرتَد ہوگئے ۔ یہ لوگ بدر کے دن مشرکین کے ساتھ نکلے اور یوں کافروں کی تعداد میں بڑھوتری کا سبب بنے۔ بالآخر غزوۂ بدر میں کفر کی حالت میں مارے گئے۔اس پر مسلمان کہنے لگے کہ ہمارے یہ ساتھی اور احباب حقیقت میں مسلمان تھے لیکن انہیں کفر کرنے اور جنگ کرنے کے لئے نکلنے پر مجبور کیا گیا تھا ۔تب ان کے بارے میں مذکورہ آیت نازل ہوئی ۔اسے امام بخاری رحمہ اللہ نے ابنِ عباس رضی اللہ عنہما سے روایت کیا ہے۔(ابن عاشور: ۵؍۱۷۴)
سوال: مسلمان کمزوری کی وجہ سے کب معذور ہوتا ہے؟

یعنی: کیا تمہیں اس بات کی استطاعت اور قدرت نہیں تھی کہ ہجرت کرجاتے جن لوگوں نے تمہیں کمزور اور دبا کچلا سمجھ رکھا تھا ان سے دورہوجاتے؟
اس آیت میں دلیل ہے کہ جس سرزمین میں کھلے عام گناہ اور معصیت کئے جاتے ہوں ،آدمی کو وہاں سے ہجرت کرلینی چاہئے۔ (القرطبی: ۷؍۶۴)
سوال: بندۂ مومن اگر کسی ایسی بستی میں رہتا ہو جہاں گناہوں کا دَور دَورہ ہواور اس کو اپنے نفس کے بارے میں ڈر ہو تو اس پر کیا واجب ہے؟

یہاں اللہ نے شیطانی وسوسوں سے نکال کر تسلی اور اطمینان دلاتے ہوئے ہجرت کی ترغیب دی ہے۔ جیسے شیطان دل میں یہ وسوسہ ڈالتا ہے کہ اگر آدمی اپنے وطن کی خوشحالی کو چھوڑنکلے گا تو وطن سے باہر کی پریشانی میں پڑجائیگا اور اگر وہ مشقت جھیل بھی لے تو مقصد ومراد تک پہنچنے سے پہلے یہ مشقت اسے موت کے منہ میں ڈھکیل دے گی۔ (البقاعی: ۲؍ ۳۰۴)
سوال: بندۂ مومن کو ہجرت سے روکنے کے لئے شیطان کیسے وسوسے ڈال کر بہکاتا ہے؟

ہر وہ شخص جس نے بھلائی کا ارادہ اورنیت کی لیکن اس نیکی کو انجام نہیں دے سکا تب بھی اللہ تعالیٰ اسے اس کارِ خیر کا پورا پورا بدلہ عطافرمائیگا جیسے اس کریم اور مہربان ذات نے اپنے اوپر اسے واجب کررکھا ہے۔ (البقاعی: ۲؍ ۳۰۵)
سوال: آیت سے اللہ کے کرم اور اس کی رحمت کا پتہ چلتا ہے ۔اس کی وضاحت کیجئے.

ہجرت کرنے والے شخص کودوبھلائیوں میں سے ایک بھلائی کا ملنا طے ہے ۔یا تو وہ اللہ کے دشمنوں سے الگ ہوکر اور بھلائی اور کشادگی سے جڑکر انہیں ذلیل کرتا ہے ؛ یا پھر اسے موت آجاتی ہے تو وہ حقیقی سعادت اور ہمیشہ کی نعمت میں پہنچ جاتا ہے ۔ (الألوسی: ۵؍۱۲۸)
سوال:اللہ کی راہ میں ہجرت کرنے والے کے لئے دو میں سے ایک بھلائی ہوتی ہے ۔وہ دوبھلائیاں کیا ہیں؟