قرآن

اللہ تعالیٰ نے صرف انہی ظاہری اقوال واعمال پر پکڑ اور باز پرس کی ہے جن کے ساتھ دل کا عمل اور ارادہ شامل ہو،جیسا کہ ارشاد فرمایا: (وَلَٰكِن يُؤَاخِذُكُم بِمَا كَسَبَتۡ قُلُوبُكُمۡۗ) ہاں تمہاری پکڑ اس چیز پرہوتی ہے ، جو تمہارے دل کا فعل ہو۔جن باتوں اور کاموں کو دل جانتا ہی نہیں اور نہ ہی ان کا قصد وارادہ رکھتاہے ، اللہ نے ان پر پکڑ نہیں کی ہے اور اسی طرح وہ بات جو آدمی اپنے دل سے کرتا ہے (یعنی حدیثِ نفس)، ان میں سے بھی صرف اسی کی پکڑ ہوگی جسے آدمی کہے یا کربیٹھے۔ (ابن تیمیہ:۱؍۵۱۷)
سوال: انسان اپنے تصرفات اورحرکات وسکنات پر جوابدہ کب ہوتا ہے؟آیت کی روشنی میں وضاحت کیجئے.

(اللہ تعالیٰ اپنی صفت حلم یعنی بردباری کی بناء پر)ان کو پکڑنے اور سزادینے میں عجلت سے کام نہیں لیتا۔
اورغالب وبرتر ذات کا اپنے سے کم تر وحقیر کی جانب سے پہنچنے والی اذیت کو برداشت کرنا اور سزانہ دینا، حلم اور بردباری ہے۔ (البقاعی:۱؍۴۲۶)
سوال:آیت کو اللہ تعالیٰ کی صفت ‘‘حلیم’’ سے ختم کرنے میں کیا دلالت ہے؟

ابن عباس رضی اللہ عنہما کہتے تھے: میں اپنی بیوی کے لئےزیب و زینت اختیار کرنا پسند کرتا ہوں،جیسے میری بیوی میرے لئے بناؤ سنگھار کرنا پسند کرتی ہے۔ اس لئے کہ اللہ تعالیٰ فرماتا ہے: (وَلَهُنَّ مِثۡلُ ٱلَّذِي عَلَيۡهِنَّ بِٱلۡمَعۡرُوفِۚ) عورتوں کے بھی ویسے ہی حقوق ہیں جس طرح ان پر مردوں کے ہیں ، بھلائی کے ساتھ۔) (البغوی:۱؍۲۲۵)
سوال: شریعت نے محض طلاق کے اسباب کو دور کرنے کا ارادہ نہیں کیا بلکہ میاں بیوی کے درمیان نیک بختی اور اچھائی کی مختلف صورتیں بھی چاہی ہیں ۔اس بات کی وضاحت کیجئے.

عقدِ نکاح، میاں بیوی میں سے ہر ایک پر دوسرے کے لئے جو حق اور ذمہ داری عائد کرتا ہے، وہ اک دم طے شدہ اور متعین نہیں ہے بلکہ اس بارے میں عرفِ عام کی طرف رجوع کیا جائے گا اور اسی کے مطابق فیصلہ ہوگا۔جیسا کہ اللہ تعالیٰ کا فرمان ہے: (وَلَهُنَّ مِثۡلُ ٱلَّذِي عَلَيۡهِنَّ بِٱلۡمَعۡرُوفِۚ)معروف طریقہ سے عورتوں کا حق ویسا ہی ہے جیسا ان پر مردوں کا حق ہے۔ (ابن تیمیہ:۱؍۵۲۳)
سوال: میاں بیوی کے حقوق طے کرنے میں کس چیز کا اعتبار کیا جائیگا؟

کسی عقلمند آدمی سے عورتوں پر مردوں کی فضیلت وبرتری پوشیدہ نہیں ہے۔ اگر کوئی دوسری وجہ نہ ہوتی سوائے اس کے کہ عورت ، مرد سے پیدا کی گئی ہے(تو فضیلت کے لئے یہی کافی ہوتا۔)لہٰذاعورت کی اصل مرد ہے ۔اور مرد کو حق ہے کہ وہ بلا اجازت تصرف کرنے سے عورت کو روک دے ۔نیز عورت شوہرکی اجازت کے بغیر (نفلی) روزہ نہیں رکھ سکتی اور تنہا حج نہیں کرسکتی اِلا یہ کہ شوہر یا کوئی محرم ساتھ ہو۔ (القرطبی:۴؍۵۳)
سوال:کفار ومنافقین مرد وعورت کے درمیان برابری کا نعرہ لگاتے ہیں ۔آپ کس طرح ان کی تردید کریں گے؟

(طلاق دو بار دینا ہے)اس لئے کہ جو شخص دومرتبہ سے زیادہ طلاق دیتاہے یا تو حرام کام کے ارتکاب کا اس کے دل میں ڈر نہیں ہے یا پھر اسے بیوی میں کوئی رغبت اور چاہت نہیں ہے بلکہ وہ صرف عورت کو ستانا اورنقصان پہنچانا چاہتا ہے۔ (السعدی:۱۰۲)
سوال: طلاق رجعی کو صرف دومرتبہ میں محدود کیوں کیا گیا ہے؟

اس آیت میں اس بات کی رہنمائی ہے کہ انسان کے لئے مناسب ہے کہ جب وہ کسی بھی معاملہ میں داخل ہوناچاہے ،خاص طور پر چھوٹی بڑی ذمہ داریوں اور عہدوں کو لینے میں،تو اپنی ذات میں اچھی طرح غوروفکر کرلے اور اگر ذمہ داری کو نبھانے کی طاقت وصلاحیت پائے اورخودپر پورا بھروسہ ہو تواقدام کرے ورنہ پیچھے ہٹ جائے۔ (السعدی:۱۰۳)
سوال: انسان پر جو عہدے اور ذمہ داریاں پیش کی جاتی ہیں ان کے متعلق اس کا کیا رویہ ہونا چاہئے؟