قرآن

جب انہوں نے اپنے معاملات کو اللہ کے حوالے کردیا اور اپنے دلوں سے اس پر اعتماد کیا تو اللہ نے انہیں چارطرح کی جزاء عطافرمائی :نعمت،فضل ،برائی کا پھیر دیا جانا او ر (اللہ کی ) رضا وخوشنودی کی پیروی کرنا ۔چنانچہ اللہ نے انہیں ذات سے راضی رہنے والا بنادیا اور خود بھی ان سے راضی ہوگیا۔ (القرطبی: ۱۶؍۴۱۷)
سوال: اہلِ ایمان نے جب اپنا معاملہ اپنے رب کے سپرد کردیا تو انہیں کون سی چار نوازشات حاصل ہوئیں؟

اللہ تعالیٰ سے ڈرنے والا حقیقت میں وہ ہے جسے یہ اندیشہ لگارہتا ہے کہ اللہ اسے دنیا یا آخرت کے عذاب میں پکڑلے گا ۔ اسی لئے کہا گیا ہے کہ: ڈرنے والا وہ نہیں ہے جو روتا رہتا ہے او ر اپنے آنسوپونچھتا رہتا ہے ۔بلکہ ڈرنے والا شخص وہ ہے جو اُن کاموں کو چھوڑدیتا ہے جن کی بناء پر اسے عذاب دیا جائیگا۔ (القرطبی: ۵؍۴۲۸)
سوال: حقیقت میں اللہ کے عذاب سے ڈرنے والا کون ہے؟

جب رحمن کے اولیاء اللہ کی خاطر ثابت قدم رہتے ہیں تو اللہ تعالیٰ،شیطان کے اولیاء کے خلاف ان کی مدد کرنے کا وعدہ پورا کرتا ہے اور جو شخص شیطان کے ڈرانے سے ڈر جائے اور اس کے ڈراورخوف کے مطابق عمل کرنے لگے تو اس شخص کے اندر شیطان کی ولایت (دوستی)پائی جاتی ہے۔ (البقاعی: ۲؍ ۱۸۵)
سوال: جوشخص شیطان سے ڈرتا ہو اور اس کے خوف کے تقاضے نبھاتا ہو ،اسے کس صفت سے متصف کیا جائیگا؟

(ﭵ ﭶ ﭷ ﭸ ﭹﭺ) وہ اللہ کو کچھ بھی نقصان نہیں پہنچاسکتے۔ نقصان پہنچانے کی نفی کو اللہ تعالیٰ سے جوڑنا دراصل مسلمانوں کی عزت افزائی (اور انہیں شرف عطاکرنا) ہے اور اس بات سے خبردار کرنا بھی ہے کہ مومنوں کو نقصان پہنچانا ، اللہ سبحانہ وتعالیٰ کو نقصان پہنچانے کے معنی میں ہے۔ (الألوسی: ۴؍۱۳۳)
سوال: اللہ تعالیٰ نے نقصان نہ ہونے کو اپنی ذات سے کیوں جوڑدیا؟

اللہ تعالیٰ ایسا نہیں ہے کہ مسلمانوں کو منافقوں سے گھلا ملا چھوڑدے چنانچہ غزوۂ اُحد میں رونماہونے والی باتوں اور کاموں سے ایمان اور نفاق کا پتہ چل گیا اورمومنوں کو منافقوں سے الگ کردیا ۔جنگ اُحد میں ان کی باتوں اور کاموں سے ایمان اور نفاق معلوم ہوگیا ۔ (وَمَا كَانَ ٱللَّهُ لِيُطۡلِعَكُمۡ عَلَى ٱلۡغَيۡبِ) یعنی: اللہ ایسا بھی نہیں ہے کہ تمہیں اس بات پر مطلع کردے کہ دلوں میں ایمان ہے یا نفاق۔ (ابن جزی:۱؍ ۱۶۸)
سوال:غزوۂ احد میں مسلمانوں کی شکست کے منظر نامے میں مسلمانوں کے لئے ایک بڑی حکمت سامنے آئی۔وہ کیا ہے؟

(حَتَّىٰ يَمِيزَ ٱلۡخَبِيثَ مِنَ ٱلطَّيِّبِ) یہاں تک کہ ناپاک کو پاک سے الگ کردے۔ وہ اس طرح کہ پرمشقت پابندیوں اور سخت حالات کے ذریعہ باطل پرست آدمی کو رسوااور اس کی برائی کو بے نقاب کردے۔ اگرچہ لمبی مدت سے اس کے باطل پر پردہ پڑا رہا ہو، کیونکہ مشکل کاموں اور سخت حالتوں پر صرف وہی بندے صبر کرتے ہیں جو عقیدے میں مخلص ،کھرے اور سچے ہوتے ہیں۔ (البقاعی: ۲؍ ۱۸۷)
سوال: اللہ تعالیٰ ،ناپاک کو پاک سے الگ کیسے کرتا ہے؟

اللہ تعالیٰ نے اپنی ذات کے بارے میں خبر دی کہ وہ باقی رہنے والا ہے اور اس کی سلطنت ہمیشہ ہمیش قائم رہنے والی ہے۔نیز وہ ازل میں ہمیشہ سے جس طرح تھا، ٹھیک اسی طرح ابد میں ہمیشہ رہے گا۔ تمام جہانوں (اور مخلوقات )سے بے نیاز ہے ۔یعنی کسی کا محتاج نہیں۔لہذا تمام مخلوقات کے فنا ہوجانے اور ان کی ملکیتوں کے ختم ہوجانے کے بعد زمین کا وہی وارث ہوگا۔(اگرچہ مالک ووارث تو وہ اب بھی ہے لیکن مخلوقات کے خاتمہ کے بعد) ساری املاک وجائداد اور مال واسباب اس طرح باقی رہ جائیں گے کہ کوئی بھی ان کا دعویدار نہیں رہ جائیگا۔ (القرطبی: ۵؍۴۴۲)
سوال: خالقِ بلند وبرترکی عظمت(بڑائی)اور مخلوق کی کمتری وبے وقعتی بیان کیجئے.