قرآن

سود خورقیامت کے دن پاگل آدمی کی طرح اٹھایا جائیگا۔یہ اس کی سزا کے طور پر بھی ہوگااور تمام اہلِ محشر کی نظروں میں قابلِ نفرت بنانے کے لئے بھی۔
(القرطبی:۴؍۳۹۰)
سوال: سودی لین دین کرنے والا کس حالت میں اٹھایا جائیگا؟

اس صفت(كَفَّارٍ أَثِيمٍ) (ناشکرا،گنہگار) جیسے الفاظ سے اس آیت کو ختم کرنے کی کچھ مناسبت ضرور ہے اور وہ یہ ہے کہ سودی لین دین کرنے والا ،رزقِ حلال کے اس حصہ پر راضی نہیں ہوتا جو اللہ تعالیٰ نے اس کے لئے متعین کیا ہے۔ اور اس کے لئے جائز کمائی کا جو حکم دیا ہے وہ اسے کافی نہیں سمجھتا۔ چنانچہ وہ حرام کمائی کی مختلف قسموں کو اپنا کر باطل طریقے سے لوگوں کے مال کھانے اور ہڑپنے کی کوشش میں لگارہتا ہے۔اس طرح یہ شخص اپنے اوپر کی گئی اللہ کی نعمت کا انکار کرنے والا اور بڑاہی ظالم وگنہگار بن جاتا ہے جو لوگوں کا مال باطل طریقے سے کھاتا ہے۔ (ابن کثیر:۱؍۳۱۲)
سوال:سود خور کو ناشکرااورگنہگار کیوں کہا گیا؟

عبداللہ بن عباس رضی اللہ عنہما سے مروی ہے : (يَمۡحَقُ ٱللَّهُ) (اللہ سود کو مٹاتا ہے۔) یعنی سود خور سے نہ صدقہ قبول کرتا ہے ،نہ جہاد،نہ حج اور نہ سلوک وصلہ رحمی۔(وَيُرۡبِي ٱلصَّدَقَٰتِ)(صدقات کو بڑھاتا ہے۔)یعنی:دنیا میں اسے بابرکت اور فائدہ مندبناتا ہے اور آخرت میں اس کے بدلے میں کئی گنا اجروثواب سے نوازتا ہے۔(وَٱللَّهُ لَا يُحِبُّ كُلَّ كَفَّارٍ ) سود کے حرام ہونے کا انکار کرنے والے شخص کو اللہ پسند نہیں کرتا۔ ( أَثِيمٍ) اور نہ اسے کھاکر گنہگار ہونے والے کو پسند کرتا ہے۔ (البغوی:۱؍۳۰۳)
سوال:سود کھانے والے پر اس کا کیا اثرہوتا ہے؟

ایسااس وجہ سے ہے کہ بدلہ عمل کی جنس سے ہوتا ہے ۔یعنی جس قسم کا عمل ہوتا ہے ،بدلہ بھی اسی طرح کا ہوتا ہے۔اب چونکہ سود خور لوگوں پر ظلم کرتا اور ان کے سرمائے کو غیر شرعی طریقے سے ہڑپ کرتاہے ۔اس لئے بدلہ میں اس کا مال برباد کردیا جاتا ہے۔اور جو آدمی کسی کے بھی ساتھ کسی بھی شکل میں سلوک و احسان کرتا ہے تو اللہ تعالیٰ اس سے کہیں زیادہ فضل وکرم والا ہے ۔لہذا یہ بندہ جس طرح دیگر بندوں پر احسان کرتا ہے ،اللہ تعالیٰ بھی اسی طرح بلکہ اس سے بڑھ کراس پر احسان وکرم فرماتا ہے۔ (السعدی: ۱۱۷)
سوال:سود خور کا بدلہ مال کی بربادی اور احسان کرنے والے کا بدلہ نیکیوں کو بڑھانا کیوں ہے؟

نماز اور زکاۃ اپنے اندرنیک اعمال کو سمیٹے ہوئے ہیں۔ان کے اسی شرف و عظمت کی وجہ سے نیز ان کی قدر ومنزلت سے آگاہ کرنے کے لئے ان کا خصوصی ذکر کیا گیاکیونکہ یہ دونوں چوٹی کے اعمال ہیں۔نماز ،بدنی اعمال میں اور زکاۃ، مالی اعمال میں۔ (القرطبی:۴؍۴۰۳)
سوال:اللہ تعالیٰ نے نماز اور زکاۃ کا خصوصی ذکر کیوں کیا ہے؟

سود اور ایمان اکٹھا نہیں رہ سکتے۔اور اس امت کی زیادہ تر مصیبتیں جن سے وہ دوچار ہے حتی کہ بنی اسرائیل جن بدترین عذاب اور قحط وخشک سالی سے دوچار ہوئےان سے بھی یہ امت دوچار ہے یہ سب سودی معاملہ کرنے والوں کے عمل کا نتیجہ تھا ۔ (البقاعی:۱؍۵۴۱)
سوال:سود کو حرام قراردینے میں سختی کیوں برتی گئی؟

جس شخص کو یہ یقین ہو کہ وہ اللہ کے پاس لوٹ کر جانے والا ہے اور وہ وہاں اسے ہر چھوٹے بڑے اور کھلے چھپے عمل کا بدلہ دے گا،نیز اللہ تعالیٰ اس پر ذرہ برابر ظلم نہیں کریگا۔تو یہ یقین اسے اپنے اندر شوق اور خوف پیدا کرنے پر مجبور کردیگا۔ (السعدی: ۱۱۷۔۱۱۸)
سوال:آدمی کے اس علم ویقین کا کیا فائدہ ہے کہ ‘‘وہ اپنے رب کی طرف پلٹنے والا ہے’’؟