قرآن

سوگ منانا یہ ہے کہ (بیوہ) عورت اپنی عدت کی پوری مدت میں خوشنما لباس،خوشبو اور زیورات،سرمہ اور مہندی لگانے جیسی زینت کی تمام چیزوں کو ترک کردے۔اس لئے کہ زینت وآرائش شادی کرنے کی رغبت وخواہش کو ظاہر کرتی ہے لہذا بیوہ کو اس (زینت) سے منع کردیا گیا تاکہ (گناہ کے) راستے بند ہوجائیں اور اللہ کی حرمتوں کو پامال ہونے سے بچایا جائے۔ (القرطبی:۴؍۱۳۳)
سوال: عورت کے سوگ منانے میں شریعت کی کوئی حکمت بیان کیجئے.

امام سعید بن مسیّب رحمہ اللہ نے فرمایا: چار مہینے دس دن،عدت کے لئے اس مدت کی تعیین کی حکمت یہ ہے کہ اتنی مدت میں بچے کے اندر روح پھونکی جاتی ہے اور کہا جاتا ہے کہ بچہ اسی مدت میں ماں کے پیٹ میں حرکت کرنے لگتا ہے۔ (البغوی:۱؍۲۳۸)
سوال: شوہر پر سوگ منانے کی مدت چار مہینے دس دن مقرر کرنے کی حکمت بیان کیجئے.

یہ اس بات پر دلیل ہے کہ عورت کا ولی اس کی نگرانی کرتا رہے۔ناجائز کاموں سے اسے روکے،واجب اور ضروری کاموں پر اسے مجبور کرے۔ولی ہی اس آیت کا مخاطب ہے اوریہ اس کی ذمہ داری ہے۔ (السعدی:۱۰۵)
سوال: ولی کا اپنی زیرِ ولایت عورت کے ساتھ کیا کردارہے؟

اللہ تبارک وتعالیٰ نے عقد نکاح کے بعد اور دخول سے پہلے عورت کو طلاق دے دینا جائز اور مباح قرار دیا ہے۔گرچہ اس میں عورت کی دل شکنی ہے۔ اسی لئے اللہ تعالیٰ نے اسے کچھ مال دینے کا حکم دیا ہے جو شوہر کی جانب سے اس کے نقصان کے بدلے دیا جائیگا۔یہ عوض شوہر اپنی حیثیت کے مطابق دیگا ۔(عَلَى ٱلۡمُوسِعِ قَدَرُهُۥ وَعَلَى ٱلۡمُقۡتِرِ قَدَرُهُۥ) خوشحال پر اپنی حیثیت کے اعتبار سے اور تنگ دست پر اس کی طاقت کے مطابق دینا ہے۔ (ابن کثیر:۱؍۲۷۲)
سوال:اللہ تعالیٰ نے اُس مطلقہ عورت کو جسے خلوَت سے پہلے طلاق دے دی گئی ، مال واسباب دینے کا حکم کیوں دیا؟

لوگوں کے درمیان جو معاملات ہوتے ہیں،ان کے دودرجے ہیں:
1۔یا تو عدل وانصاف سے معاملہ ہوگاجو فرض ہے اور یہ اس طرح ہوتا ہے کہ جو حق واجب ہے وہی لیا جائے اور جو واجب ہے وہی دیا جائے۔
2۔ یا پھرواجب سے زیادہ فضل واحسان کے ساتھ معاملہ کیا جائے ۔وہ اس طرح کہ جو واجب نہیں ہے وہ دے دیا جائے اور حقوق (لینے) میں درگذر اور چھوٹ سے کام لیا جائے اور دل میں جو کدورتیں اور نفرتیں ہیں انہیں نظر انداز کیا جائے لہٰذا انسان کے لئے مناسب نہیں کہ وہ (فضیلت واحسان کے ) اس درجہ و مقام کو بھلادے۔ بلکہ اس درجہ پر عمل کرنا چاہئے خواہ کبھی کبھار ہی کرے۔ (السعدی:۱۰۵)
سوال: ہمیں آپس میں فضل واحسان کو بھلادینے سے منع کیا گیا ہے۔اس کا مقصود کیا ہے؟

یہاں“فضل”احسان کے معنی میں ہے۔یعنی تم اس احسان کو نہ بھولو جو طلاق سے پہلے تمہارے درمیان موجود تھا۔تم اسے ہمیشہ یاد رکھو۔تاکہ تم میں سے ہرایک اپنے ساتھی کے احسان کے بدلہ میں عفو ودرگذر کی طرف مائل ہوجائے۔ (الألوسی: ۳؍۱۵۵)
سوال: میاں بیوی سے آپس کے فضل واحسان کو یادرکھنے کا مطالبہ کیوں کیا گیا ہے؟

شوہرجسے رجولت یعنی مرد ہونے کی فضیلت حاصل ہے۔اسی کا حق ہے کہ وہ معاف کرے اور معاف کی ہوئی چیز پر عورتوں سے بازپرس نہ کرے۔ اسی لئے قرآن میں عورتوں کے لئے اس کا حکم آیا ہے نہ اس کی ترغیب۔اور یہ تو انتہائی بری اور گری ہوئی بات ہوگی کہ مرد نے عورت کو جوکچھ دے دیا تھا ، اسے واپس لوٹانے کے لئے عورت پر دباؤ ڈالے۔بلکہ مناسب یہ ہے کہ آپس کے فضل واحسان کو نہ بھولو۔ (البقاعی:۱؍۴۴۸)
سوال: اللہ تعالیٰ کے قول: (وَلَا تَنسَوُاْ ٱلۡفَضۡلَ بَيۡنَكُمۡ)سے کیا معلوم ہوتا ہے.