قرآن

(رمضان کی راتوں میں ) اللہ تعالیٰ کی طرف سے طلوعِ فجر یعنی صبحِ صادق تک کھانے کو جائز رکھنے میں سحری کھانے کے مستحب ہونے کی دلیل ہے ، کیونکہ اس کا تعلق رخصتوں سے ہے اور ان پر عمل کرنا اللہ کو پسند ہے۔ (ابن کثیر:۱؍۲۱۰)
سوال:آیت کو سحری کے مستحب ہونے پر کیسے دلیل بنا سکتے ہیں؟

روزوں کے بعد اللہ تعالیٰ نے اعتکاف کا تذکرہ فرمایا ہے،اس میں اس بات کی رہنمائی اور آگاہی ہے کہ اعتکاف ماہ صیام کے اندر یا اس کے آخر میں ہونا چاہئے ۔(ابن کثیر:۱؍۲۱۳)
سوال: روزوں کے بعد اعتکاف کا بیان کس بات پر دلالت کرتا ہے؟

علماء کا اتفاق ہے کہ اعتکاف صرف مساجد میں ہی ہوسکتا ہے جیسا کہ اللہ تعالیٰ کا ارشاد ہے: (وَلَا تُبَٰشِرُوهُنَّ وَأَنتُمۡ عَٰكِفُونَ فِي ٱلۡمَسَٰجِدِ) اور جب تم مسجدوں میں اعتکاف کی حالت میں رہو تو عورتوں سے ہمبستری نہ کرو۔
اعتکاف نہ تو خلوت وتنہائی میں ہوگا ،نہ غیر خلوت میں، کسی غار میں نہ کسی قبر کے پاس اور نہ ہی ان کے علاوہ کسی اور جگہ جن کی طرف گمراہ لوگ سفر کرتے اور وہاں اعتکاف کا قصد وارادہ کرتے ہیں۔جیسے مشرکین اپنے بتوں کے پاس اعتکاف (اور مجاوری ) کرتے ہیں۔ (ابن تیمیہ:۱؍۴۴۸۔۴۴۹)
سوال:کیا مساجد کے علاوہ بھی کسی مقام پر اعتکاف ہوسکتا ہے؟آیت سے دلیل دیجئے.

(فَلَا تَقۡرَبُوهَا) (تم ان کے قریب نہ جاؤ)اللہ تعالیٰ کا یہ فرمان ‘‘فَلا تَفْعَلُوْھَا’’ (تم انہیں نہ کرو) سے زیادہ بلیغ اور معنی خیز ہے۔اس لئے کہ ‘‘قریب نہ جانے’’ کے معنی میں خودحرام کام سے ممانعت بھی شامل ہے۔اور اس حرام تک پہنچانے والے وسائل اور راستوں کی ممانعت بھی شامل ہے۔ (یعنی قریب نہ جاؤ کہہ کر فعل حرام اور اس کے ذرائع دونوں کی حرمت بیان کردی۔)اور مومن بندے کو حکم دیا گیا ہے کہ وہ حرام چیزوں کو نہ صرف چھوڑدے بلکہ جہاں تک ہوسکے ان سے دوررہے ۔نیز ہر اس راستہ اور ذریعہ کو بھی چھوڑدے جو حرام چیزوں کی طرف لے جاتے ہیں۔ (السعدی:۸۷۔۸۸)
سوال:اللہ تعالیٰ نے اپنی حرام کردہ حدود کے ارتکاب سے منع کرنے کی بجائے ان کے قریب جانے سے کیوں منع فرمایا؟

جب روزے اور اس سے متعلق احکامات کا بیان ہوچکا تو اللہ تعالیٰ نے اس کے فوراً بعد حرام کھانے کی ممانعت ذکر فرمائی ۔ (اس لئے کہ)حرام خوری کے نتیجہ میں روزے ہوں یا اعتکاف،بندے کی عبادت بے اثر اور قبولیت سے محروم ہوجاتی ہے؟ (الألوسی:۲؍۶۹)
سوال:حرام کھانے کی ممانعت سے روزے کا کیا تعلق ہے؟

اور تم اپنے مال کے ذریعہ حکّام کی خوشامد مت کرو،نہ انہیں رشوت دو کہ وہ تمہارے حق میں حق سے بڑھ کر فیصلہ کردیں۔ اہل سنت کا اس بات پر اتفاق ہے کہ جو شخص(صاحبِ اختیار)ایسی کوئی بھی چیز لے جسے“مال” کہا جاسکے،تو اس کی وجہ سے وہ فاسق (گناہ گار) ہوجائیگا اور اس کے لئے اس (مال )کا لینا حرام ہے۔ مال خواہ کم ہو یازیادہ۔ (القرطبی:۳؍۲۲۶)
سوال:روزہ دار کا رشوت سے دور رہنا ، روزے کی حفاظت میں شامل ہے۔یہ بات آیت کے سیاق وسباق کی روشنی میں واضح کیجئے.

جو متقی اور پرہیزگار ہوتا ہے تو اس کے تقویٰ کے مطابق (اللہ کے فضل سے)اس کے دل سے حکمت ودانائی کے چشمے پھوٹتے رہتے ہیں اور باریک سے باریک راز اس پر ظاہر ہوتے رہتے ہیں۔ (الألوسی:۲؍۷۴)
سوال:تقویٰ کا کیافائدہ ہے؟