قرآن

اس ارشاد کا یہ مطلب نہیں ہے کہ وہ لوگ سننے اور دیکھنے کی صلاحیت سے پوری طرح محروم تھے ۔ بلکہ مطلب یہ ہے کہ وہ لوگ ان باتوں کو سننے او ر دیکھنے سے عاجز ومحروم تھے جو باتیں انہیں دینِ حق کے بارے میں فائدہ دینے والی تھیں۔ (ابن جُزی: ۱؍ ۳۳۰)
سوال: کب یہ مانا جائیگا کہ آپ آخرت کے معاملے میں اپنے کان اور اپنی آنکھوں سے فائدہ اٹھانے والے ہیں؟

چونکہ وہ لوگ اجروثواب کے راستے پرنہیں چلتے اس لئے وہ جانوروں کی طرح ہیں ،جن کی خواہش بس کھانے پینے تک محدود ہوتی ہے۔بلکہ وہ لوگ تو جانوروں سے بھی گئے گذرے ہیں کیونکہ جانور تو اپنا فائدہ و نقصان دیکھتے ہیں۔اور اپنے مالک کے پیچھے پیچھے ہولیتے ہیں ،اس کی باتیں مانتے ہیں ۔جبکہ وہ لوگ انسان ہوتے ہوئے ایسا نہیں کرتے ۔ (القرطبی: ۹؍۳۹۰)
سوال: بعض انسان جانورو ں سے زیادہ گمراہ اور گئے گذرے کیوں ہوتے ہیں؟

اللہ سبحانہ نے اپنے ناموں کو (حُسۡنَىٰ) یعنی بہترین اور سب سے اچھے ہونے کی صفت سے ذکر فرمایاہے اس لئے کہ اللہ کے ناموں کو سننا کانوں کو اور دلوں کو اچھااور بھلا لگتاہے کیونکہ وہ سب کے سب اللہ کی توحید ،اس کی عزت وعظمت ،فیاضی وسخاوت ،شفقت ورحمت اور اس کے فضل واحسان پر دلالت کرتے ہیں ۔ (القرطبی: ۹؍۳۹۳)
سوال: اللہ تعالیٰ نے اپنے ناموں کو (حُسۡنَىٰ) یعنی بہترین کیوں کہا ہے؟

یعنی: اللہ سے -جو بھی مانگو-اس کے ناموں کے ذریعہ مانگو،اپنی دعاؤں میں اس کے ناموں کا وسیلہ پکڑو،چنانچہ اللہ کے ہر نام کے ذریعہ وہ دعا مانگی جائے جو اس کے نام کے معنی ومطلب سے مناسبت رکھتی ہو ۔مثال کے طور پر یہ کہو: “یَا رَحِیْم! اِرحَمْنِیْ ”۔یعنی اے رحم کرنے والے !مجھ پر رحم فرما۔
“یَا حَکِیْم! اُحْکُمْ لِی” ۔ اے حکمت والے! میرے حق میں بہتر فیصلہ کردے۔ (القرطبی: ۹؍۳۹۳)
سوال: بندۂ مومن اپنے رب کو اس کے اسماءِ حسنیٰ یعنی بہترین ناموں کے ذریعہ کیسے پکارے اور دعا مانگے؟

اللہ کے ناموں میں الحادیعنی ٹیڑھاپن برتنے والوں کو چھوڑدینے کا مطلب ہے کہ:جب یہ بات کھل کر سامنے آگئی کہ وہ لوگ حق کو جاننا اور ماننا نہیں چاہتے، حق کو جاننا ان کا مقصد ہی نہیں ہے تو پھر تم ان سے بحث وتکرار میں سر مت کھپاؤ ،ان سے لمبی چوڑی گفتگوسے رک جاؤ۔یااس کاایک اور مطلب یہ ہے کہ اللہ کے ناموں میں ٹیڑھا راستہ اختیار کرنے والوں یعنی مُلحدوں کی باتوں پر کان مت لگاؤ تاکہ عام مسلمان ان کے شکوک وشبہات سے متاثر ہوکر فتنے میں نہ پڑیں۔ (ابن عاشور: ۹؍۱۸۹)
سوال: جو لوگ اللہ کے ناموں میں الحاد یعنی کجروی اور ٹیڑھاپن اختیار کرتے ہیں انہیں چھوڑدینے کاکیا مطلب ہے؟

آیت یہ بات بتارہی ہے کہ اللہ عزوجل نے تاریخ کے کسی بھی زمانے اور کسی بھی وقت میں دنیا کو حق کی طرف بلانے والے داعی سے خالی نہیں رکھا ۔(القرطبی: ۹؍۳۹۷)
سوال: کیا کوئی زمانہ ایسا رہا ہے جو اللہ تعالیٰ کے لئے اس کے دین کی طرف دعوت دینے والوں سے خالی رہا ہو؟

اللہ تعالیٰ انہیں اس طرح بتدریج یعنی آہستہ آہستہ تباہی کی طرف لے جائیگا کہ انہیں اس کی خبر تک نہیں ہوسکے گی ۔کلبی رحمہ اللہ اس کا مطلب بیان کرتے ہوئے کہتے ہیں :اللہ تعالیٰ ان کے برے اعمال کو ان کی نگاہوں میں خوبصورت اور خوشنمابنادیتا ہے اورپھرانہیں ہلاک وبرباد کردیتا ہے۔
ضحّاک رحمہ اللہ نے کہاکہ :جب بھی وہ کوئی نئی برائی اور نافرمانی کرتے ہیں تو ہم انہیں نئی نعمت دے دیتے ہیں۔ سفیان ثَوری رحمہ اللہ اس کا مطلب یوں بیان کرتے ہیں کہ (اللہ تعالیٰ نے فرمایا):ہم نعمتوں میں کوئی کمی نہیں کریں گے ،انہیں بھرپور نعمتیں دیں گے لیکن ان نعمتوں کاشکربجالانے کی انہیں توفیق نہیں دیں گے ۔ (البغوی: ۲؍ ۱۷۶)
سوال:لوگوں کا بتدریج ہلاکت کی طرف جانا ،اس طرح کہ انہیں اس کی خبر بھی نہ ہو ۔یہ کیسے ہوتا ہے؟