قرآن

اہلِ ایمان کی یہ ناگواری فطری ناگواری ہے کیونکہ جنگ میں مال کاصرف ہوجانا اورنفس کو مشقت وجوکھم میں ڈالنا ہوتا ہے ۔ایسا نہیں ہے کہ وہ اللہ کے حکم کو ناپسند کرتے ہیں۔ (البغوی:۱؍۲۰۳)
سوال:مومنین کے لئے اللہ کی راہ میں جنگ ناپسندیدہ کیسے ہوتی ہے؟

(جہاد میں خیر ہے)اس لئے کہ اللہ کی راہ میں لڑائی کے نتیجہ میں تمہیں دشمنوں پر فتح ونصرت حاصل ہوتی ہے اور ان کے شہر وملک ،مال واسباب اوربال بچے تمہارے قبضہ میں آجاتے ہیں۔ (ابن کثیر:۱؍۲۳۹)
سوال:جہاد وقتال میں مشقت وتکلیف کا وجود ظاہر ہے ،پھر اس میں خیر کس طرح ہے؟

اللہ کی راہ میں جہادنہ کرنے کے نتیجہ میں ہوسکتا ہے کہ ملک اور حکومت پر دشمن کا غلبہ اور قبضہ ہوجائے۔ (ابن کثیر:۱؍۲۳۹)
سوال:اللہ کی راہ میں جہادنہ کرنامعاشرہ کو اچھا لگتا ہے۔حالانکہ یہ اس کے حق میں برا ہوتا ہے۔کیسے؟

جان لینے میں بڑی برائی ہے لیکن کفر اور اہل کفر کے غلبہ کی شکل میں لاحق ہونے والا فتنہ اس سے کہیں زیادہ برا ہے ۔لہذا دونوں میں جو کم تر خرابی ہے اسے اختیار کرکے زیادہ بڑے فساد کا خاتمہ کیا جائیگا۔ (ابن تیمیہ:۱؍۵۰۱)
سوال: زیادہ بگاڑکس چیز میں ہے :سماج کا کفر کی طرف جانا ،یا اس کا جہاد کی طرف جانا ؟

آیت میں اس بات کی طرف اشارہ ہے کہ بندہ خواہ کتنے ہی بڑے بڑے اور زیادہ سے زیادہ اعمال کرلے۔اس کے لئے یہ مناسب نہیں کہ محض اپنے اعمال پر بھروسہ کرکے بیٹھ جائے۔بلکہ اسے اپنے رب کی رحمت کا آسرا اور آس رکھنی چاہئے اور یہ امید رکھنی چاہئے کہ اس کے اعمال قبول ہوجائیں،گناہ معاف ہوجائیں اور عیوب (برائیوں) کی پردہ پوشی ہوجائے۔ (السعدی:۹۸)
سوال: آیت میں نیک اعمال کرنے والوں کو بہت بڑی تنبیہ ہے۔وہ کیا ہے؟

اللہ تعالیٰ نے مومنوں کی تعریف کی پھر بھی یہ کہا کہ (يَرۡجُونَ) وہ امید رکھتے ہیں۔کیونکہ اس دنیا میں کوئی بھی شخص خواہ وہ اللہ کی اطاعت کی ہر حد اور بلندی کو پہنچ گیا ہو وہ یقینی طور پر نہیں جانتا کہ وہ جنت میں جائیگا۔اس کی دووجہیں ہیں:
‌أ. اسے نہیں معلوم کہ اس کا خاتمہ کس حالت پر ہوگا۔
‌ب. تاکہ وہ اپنے عمل پر اعتماد وبھروسہ نہ کرنے لگے۔ (القرطبی:۳؍۴۳۲)
سوال:اللہ تعالیٰ نے مومنوں کے بارے میں (يَرۡجُونَ) یعنی امید رکھتے ہیں۔کیوں کہا۔جبکہ یہ امکان کاصیغہ ہے (یقینی نہیں)حالانکہ ان کے اعمال بہت بڑے بڑے ہیں؟

یعنی آیتوں میں(غوروفکرکرو)تاکہ ان سے احکام نکال سکو اور ان سے جڑی ہوئی مصلحتوں اور فائدوں کو سمجھ سکو۔ آیتوں کی وضاحت کے لئے ان میں غور وفکر کو مقصد بنانے کی امید کی گئی ہے تاکہ تم زیادہ بہتر اور مفید چیز کو اختیار کرو اور جو چیز نقصاند ہ ہے یا بے فائدہ ہے اس سے بچ جاؤ ۔نیز اس سے بھی بچے رہو جو تم کو فائدے سے زیادہ نقصان پہنچانے والی ہے۔ (الألوسی:۲؍۱۱۶)
سوال:قرآن کی آیات میں غور وفکر کا کیا فائدہ ہے؟