قرآن

حسرت: بے انتہا شرمندگی اور کسی ایسی چیز کے کھوجانے پر افسوس کو کہتے ہیں جس کی تلافی ممکن نہ ہو۔اور اِنذارایسی خبر کو کہتے ہیں جس میں دھمکی بھی ہو۔ مطلب یہ ہے کہ لوگوں کو قیامت کے دن سے ڈرائیے۔یہاں قیامت کے دن کو حسرت کادن کہا گیاہے کیونکہ دنیا میں سستی اور کوتاہی کی وجہ سے کفار اس دن بہت زیادہ شرمندہ ہوں گے۔ اور مومن بھی اپنی کوتاہیوں کی وجہ سے اس دن شرمندہ ہوسکتے ہیں۔ (شنقیطی: ۳؍۴۲۲)
سوال: قیامت کے دن کو حسرت کا دن کیوں کہا گیا؟او ر کیا حسرت وندامت صرف کافروں کے ساتھ خاص ہے؟

“صِدّیق” بہت زیادہ سچ بولنے والے اور اس پر جمے رہنے والے کو کہتے ہیں اور یہ بھی کہا گیا ہے کہ صدیق اسے کہتے ہیں جو اللہ کی وحدانیت کی تصدیق کرے، انبیاء ورسل کی تصدیق کرے،قیامت کی تصدیق کرے،نیز احکامات کو بجا لائے اور اس پر عمل کرے۔ (البغوی: ۳؍۸۸)
سوال: بندہ صدیق کیسے بنتا ہے؟

یوں ابراہیم خلیل علیہ السلام نے اپنے باپ کو آسان سے آسان تر بات کی طرف مرحلہ واردعوت دی۔پہلےآپ نے انہیں اپنے علم کے بارے میں بتایا کہ یہ علم آپ پر میری اطاعت کو واجب کرتی ہے۔اگر آپ میری اطاعت کریں گے تو آپ کو سیدھے راستہ کی رہنمائی مل جائیگی۔پھر آپ نے انہیں شیطان کی عبادت کرنے سے منع فرمایا اور انہیں نقصان اور گھاٹے کی تمام صورتوں سے آگاہ کیا جو شیطان کی عبادت میں پائی جاتی ہیں۔پھر اللہ تعالیٰ کے عذاب اور اس کی ناراضگی سے ڈرایا کہ اگر وہ اپنے اسی حال پر قائم رہے تو ضرور اللہ کے عذاب کا سامنا کرنا پڑیگا اور شیطان کے دوست بن بیٹھیں گے۔ (السعدی:۵۹۴)
سوال: کسی چیز کودھیرے دھیرے تھوڑا تھوڑابتانا دعوت الی اللہ کے میدان میں وہ اہم چیز ہے جس کی پابندی ایک داعی کو کرنی چاہئے۔یہ بات ہم ابراہیم علیہ السلام کے واقعہ سے کیسے سیکھتے ہیں؟

اس میں جو نرم گفتاری پائی جاتی ہے وہ کسی سے مخفی نہیں کیونکہ ابراہیم علیہ السلام نے یہ نہیں فرمایاکہ “اباجان!میں عالم ہوں اور آپ جاہل ہیں”۔یا “آپ کے پاس کوئی علم نہیں”۔ بلکہ انہوں نے اس اندازمیں گفتگو فرمائی جس سے یہ معلوم ہوتا ہے کہ بیشک میرے اور آپ دونوں کے پاس علم ہے مگر جو علم مجھ تک پہنچا وہ آپ کے پاس نہیں پہنچا۔(السعدی؍۴۹۴)
سوال: دعوت کے میدان میں لوگوں سے گفتگو کرتے وقت ایک داعی اس آیت سے کیسے فائدہ حاصل کرسکتا ہے؟

(عصيًّا) کی صفت لائی گئی ہے جو کہ “عِصیان” سے صیغہ مبالغہ ہے اور اس کے ساتھ فعل (كان) کا اضافہ بھی ہے۔یہ بتانے کے لئے کہ شیطان اپنے رب کی نافرمانی میں ہمیشہ سے ملوث ہے اور رہیگا، نافرمانی میں اس کے قدم بہت مضبوط ہیں۔ (ابن عاشور: ۱۶؍۱۱۷)
سوال: شیطان کو(عصيًّا)سے کیوں متصف کیاگیا؟

ابراہیم خلیل علیہ السلام نے اپنے والد کو بالکل اسی طرح جواب دیا جس طرح رحمٰن کے بندے جاہلوں کے خطاب کا جواب دیتے ہیں۔آپ ان سے گالی گلوچ کے ساتھ پیش نہیں آئے بلکہ صبر سے کام لیااور کوئی ایسی بات نہیں کہی جو باپ کو ناگوارگذرتی بلکہ کہا:آپ پر سلامتی ہو ۔ (السعدی:۴۹۵)
سوال:داعی کو گالی گلوچ اور ناگوارباتوں کا سامنا کرنا پڑے تو وہ ادب واخلاق کا مظاہرہ کس طرح کرے؟

یہ دراصل اس داعئِ حق کا وظیفہ ہے جو ایسے لوگوں سے مایوس ہوگیا ہو جن کو اس نے اللہ تعالیٰ کی طرف دعوت دی مگر انہوں نے ٹھکرادیا۔ لہذا جو کوئی اس قسم کی صورت حال میں مبتلا ہوجائے تو اس پر فرض ہے کہ وہ اپنے نفس کی اصلاح میں مشغول رہے اور اپنے رب سے امید رکھے کہ وہ اس کی کوشش کو قبول فرمائیگااور وہ ہر طرح کی برائی اور برے لوگوں سے دور رہے۔ (السعدی؍۴۹۵)
سوال: داعی اس وقت کیا کرے جب اس کی دعوت کو مسلسل ٹھکرایا جارہا ہو؟