قرآن

نیک مومن بندے جب ایمان اور تقویٰ کے ذریعہ اپنے رب کودوست اور کارساز بنالیتے ہیں اور اللہ کے علاوہ دوسرے کو جو نفع ونقصان دے ہی نہیں سکتا اسے اپناکارساز نہیں بناتے تو اللہ تعالیٰ ان کا کارساز اور مددگار بن جاتا ہے ،ان کے ساتھ نرمی اور مہربانی کا برتاؤ کرتا ہے اور ہر اس کا م میں ان کی مدد کرتا ہے جس میں ان کے دین اوردنیا کی کوئی بھلائی اورفائدہ ہو اوران نیک بندوں سے ہر ناپسندیدہ چیز اور برائی کو دور کردیتا ہے۔ (السعدی: ۳۱۲)
سوال: انسان کس طرح ان لوگوں کے گروہ میں شامل ہوسکتاہے جن کی حفاظت اور نگرانی کا ذمہ دار اور کارساز اللہ تعالیٰ بن جاتاہے؟

اگر کوئی شخص آپ کے ساتھ جہالت اور نادانی کابرتاؤ کرے تو آپ اس کا جواب بدسلوکی اور نادانی سے نہ دیں ۔ (البغوی: ۲؍ ۱۸۴)
سوال: اگر کوئی آدمی آپ کو گالی دے ،برابھلاکہے اور ناحق آپ پر عیب لگائے تو آپ کیا کریں گے؟

“نَزْغُ الشَّیْطَان”سے مراد ہے : حق کے بارے میں شیطان کا شک پیدا کرنا وسوسہ ڈالنا اورگناہوں کا حکم دینا یاطیش اور اشتعال دلانا۔ چنانچہ اللہ تعالیٰ نے حکم دیا ہے کہ ایسی حالت میں اس کی پناہ اور حفاظت مانگو ،جیسا کہ حدیثِ رسول ﷺ میں آیا ہے کہ : ایک آدمی کوبہت سخت غصہ آگیا تب رسول اللہ ﷺ نے فرمایا: “اِنِّیْ لَأَعْلَمُ کَلِمَۃً لَوْ قَالَہَا لَذَهَبَ عَنْہُ مَا بِہٖ، تَعَوَّذْ بِاﷲِ مِنَ الشَّیطَانِ الرَّجِیْم”۔ میں ایک ایساکلمہ جانتاہوں کہ اگر یہ شخص اسے کہہ لے تو اس کا غصہ ٹھنڈا ہوجائے گا ،تم مردود شیطان سے بچنے کے لئے اللہ کی پناہ مانگویعنی “أَعُوْذُ بِاﷲِ مِنَ الشَّیطَانِ الرَّجِیْم”کہو۔ (متفق علیہ) (ابن جزی: ۱؍۵ ۳۳)
سوال: شیطان کے کچھ و سوسوں اور بہکاووں کی مثال دیجئے.

(فاستعذ بالله) اللہ کی پناہ میں آؤ۔یعنی: اللہ سے یہ طلب کرو اور مانگو کہ وہ اس شیطانی وسوسے ،اس کے بہکاوے اور اس کے اثر سے بچالے اور اپنی حفاظت میں لے لے ۔ اس طرح اللہ تعالیٰ نے حکم دیا ہے کہ شیطانی وسوسے کو دورکرنے اور اس کے بہکاوے میں نہ آنے کے لئے اسی کا سہارا لیں اور اسی سے پناہ مانگیں ۔ (القرطبی: ۹؍۴۲۳)
سوال:قرآن نے ہماری جو رہنمائی کی ہے اس کے مطابق مومن بندہ شیطان کے وسوسے اور بہکاوے کو کس طرح دور کرسکتا ہے؟

نیک بندوں کو جب کوئی شیطانی وسوسہ اور خیال چھو بھی جاتا ہے تو وہ چونک اٹھتے ہیں ،بوکھلا جاتے ہیں۔یعنی: وہ لوگ اپنے ذہن پر زور دے کریاد کرتے ، سوچتے اور غور کرتے ہیں یہ دیکھنے اور سمجھنے کے لئے کہ کہاں اور کس موقع پر ہم سے گناہ سرزد ہوئے ہیں۔ سُدّی رحمہ اللہ نے فرمایا: متقی و پرہیزگار بندوں سے جب بھی کوئی غلطی سرزد ہوتی ہے تو وہ فوراً توبہ کرتے ہیں۔ (البغوی: ۲؍ ۱۸۵)
سوال: مومن بندہ جب کسی گناہ میں پڑجاتا ہے تو اس کی کیا حالت ہوتی ہے؟

سعید بن جُبیر رحمہ اللہ کہتے ہیں:آیت میں وہ شخص مراد ہے جو غصے میں بھر جائے مگر سخت غصے کی اس حالت میں اسے اللہ تعالیٰ یاد آجاتا ہے تب وہ اپنا غصہ پی جاتا ہے ۔امام لیث، مجاہد رحمہ اللہ کا قول روایت کرتے ہوئے کہتے ہیں کہ :یہ وہ شخص ہے جو گناہ کا ارادہ کرتا ہے مگراچانک اسے اللہ کی یاد آتی ہے اور وہ گناہ سے باز آجاتا ہے ۔ (ابن تیمیہ:۳؍۲۳۹)
سوال: وہ کون لوگ ہیں کہ جب انہیں کوئی شیطانی وسوسہ اور خیال آلیتا ہے تو وہ چونک پڑتے ہیں اور پھر ان کی آنکھیں کھل جاتی ہیں؟

یہ آیت میں ذکر کئے گئے چند اہم آداب ہیں جن کا لحاظ ویسے ہی رکھنا چاہئے جیسا کہ لحاظ رکھنے کا حق ہے ۔
آدابِ ذکر یہ ہیں: رات اور دن کی ہر گھڑی اور ہر وقت میں زیادہ سے زیادہ اللہ کا ذکر کیا جائے ۔خاص طور سے دن کے دونوں کنارے یعنی صبح اورشام کے وقت ۔ذکر اور دعاخلوص اورخشوع وخضوع کے ساتھ ہو (اس میں عاجزی ہو )اللہ کے سامنے لاچار اور بے کس بن کر ذلت وپستی اختیارکی جائے ۔ کوئی شور وغل نہ کرے بلکہ پرسکون اور خاموش رہے ۔ذکر اور دعا کرنے والے بندے کا دل اور اس کی زبان ایک دوسرے کے موافق اور ساتھ ساتھ ہوں ۔ادب واحترام اور وقار ہو ۔دعااور ذکرکی طرف پوری توجہ رہے ۔نیز اس کے ساتھ دل کو حاضر رکھے ۔اسے غافل نہ ہونے دے اس لئے کہ اللہ تعالیٰ ایسی دعا کو قبول نہیں کرتا جسے مانگنے والا غافل اور بے پروا ہو ۔ (السعدی: ۳۱۴)
سوال: آیت نے ذکر اور دعا کے قبول ہونے کے اسباب میں سے ایک اہم سبب کی طرف رہنمائی کی ہے ،وہ اہم سبب کیا ہے؟