قرآن

آیت کا یہ مطلب نہیں نکلتا کہ نیکی کا حکم دینے اور برائی سے روکنے کی ذمہ داری کی ادائیگی کو چھوڑدینا اوراس میں غفلت برتنا بندے کو نقصان نہیں پہنچائیگا ؛ کیونکہ بندے کی خود اپنی ‘‘ہدایت’’ اس وقت تک پوری نہیں ہوسکتی جب تک وہ اپنے اوپر عائد ہونے والے ‘‘امر بالمعروف ونہی عن المنکر’’ کے فریضے کو ادا نہ کرے۔
ہاں! جب بندہ برائی کو اپنے ہاتھ اور زبان سے روکنے میں بے بس ہو اور وہ اپنے دل سے برائی کا انکار کرے تو ایسی صورت میں دوسروں کی گمراہی اور برائی اسے کوئی نقصان نہیں پہنچائیگی۔ (السعدی: ۲۴۶)
سوال: آپ اس شخص کی تردیدکیسے کریں گے جو مذکورہ آیت سے ‘‘امر بالمعروف ونہی عن المنکر’’کو چھوڑنے کا جواز نکالے؟

آیت کریمہ کے ظاہری الفاظ سے کسی کم فہم کو یہ وہم وگمان ہوسکتا ہے کہ نیکی کا حکم دینا اور برائی سے روکنا واجب نہیں ہے ۔ حالانکہ خود آیت میں اس بات کا صاف اشارہ موجود ہے کہ آیت کا حکم ایسے شخص کے بارے میں ہے جس نے اصلاح کے لئے اپنی پوری کوشش صرف کی ہے پھر بھی مخاطب آدمی نے اصلاح کی بات قبول نہیں کی ۔اور یہ بات اللہ تعالیٰ کے اس فرمان میں ہے: (اِذَا اهْتَدَيْتُمْ) جب تم ہدایت پر قائم رہو۔ کیونکہ جو شخص نیکی کا حکم دینا چھوڑدے، وہ ہدایت پر باقی نہیں رہتا ۔ (الشنقیطی: ۱؍ ۴۵۹)
سوال: گمراہی کا نقصان صرف گمراہ شخص تک کب محدود رہتا ہے اور اس سے دوسروں کو نقصان کب نہیں پہنچتا؟

آدمی کی وصیت معتبر ہوگی اور اسے مانا جائیگا اگرچہ وصیت کرنے والے پر موت کی ابتدائی علامتیں ظاہر ہوچکی ہوں۔ بشرطیکہ اس کے ہوش وحواس سلامت ہوں ۔ (السعدی: ۲۴۷)
سوال: کیا قریب المرگ شخص کا وصیت کرنا جائز ہے ؟اس بات سے آپ کو کیافائدہ حاصل ہوا؟

اللہ تعالیٰ نے اس آیت میں موت کو مصیبت کا نام دیا ہے اگرچہ موت انتہائی بھاری مصیبت اور بہت بڑی آفت ہے لیکن اس سے غفلت برتنا ،اس کی یاد سے منہ پھیرلینا ،اس کے بارے میں غوروفکر اور سوچ بچار سے پہلو تہی برتنا ،اس سے بے پروا اور بے فکر ہوجانا اور اس کے لئے عمل اور تیاری نہ کرنا یہ سب خود موت سے کہیں زیادہ بڑی مصیبت اور سنگین تر مسئلہ ہے ۔ حالانکہ تنہا موت کے اندر نصیحت حاصل کرنے والے کے لئے عبرت ونصیحت ہے اور غور وفکر کرنے والے کے لئے سوچ بچار کرنے کا بھرپور سامان ہے ۔ (القرطبی: ۸؍۲۶۴)
سوال: کیا موت مصیبت ہے ؟ اور اس سے بڑی اور اس سے زیادہ سخت مصیبت کیا ہے؟

حلفیہ گواہی کے لئے نماز کے بعد کی شرط لگانے کا فائدہ اس وقت کی عظمت کو بتانا اور اس کے ذریعہ گواہ کو ڈرانا ہے کیونکہ فرشتےاس وقت حاضر رہتے ہیں ۔
(القرطبی: ۸؍۲۶۶)
سوال: قسم اور گواہی کے لئے نماز بعدکے وقت کی شرط کیوں لگائی گئی ہے؟

(وَلَا نَكۡتُمُ شَهَٰدَةَ ٱللَّهِ) ہم اللہ کے لئے گواہی کو نہیں چھپائیں گے۔
یعنی وہ گواہی جسے یاد رکھنے اور ضرورت کے موقع پر اسے پیش کرنے اورادا کرنے کا اللہ نے حکم دیا ہے۔اس شہادت کی عظمتِ شان اور اہمیت جتانے کے لئے اسے اللہ کی طرف منسوب کیا گیا ہے ۔(ابن جُزی: ۱؍۲۵۵)
سوال: شہادت یعنی گواہی کی نسبت اللہ کی طرف کرنے کی کیا وجہ ہے؟

(وَٱتَّقُواْ ٱللَّهَ وَٱسۡمَعُواْۗ)اللہ سے ڈرتے رہو اور اس کے احکام کو سنو۔
یعنی جن چیزوں کا تمہیں حکم دیا جارہا ہے انہیں کرنے کی نیت سے سنو۔
(وَٱللَّهُ لَا يَهۡدِي ٱلۡقَوۡمَ ٱلۡفَٰسِقِينَ) اور اللہ نافرمان لوگوں پرسعادت وکامرانی کی راہ نہیں کھولتا۔
یہ آیت کے پچھلے مضمون کا تکملہ ہے ۔جس کا مرادی مطلب یہ ہے کہ اگر تم اللہ سے نہیں ڈرتے اور اس کی باتیں نہیں سنتے، مانتے تو تم فاسق وگنہگارہوکر فرمانبرداری کے دائرے سے باہر نکل جاؤگے اور اللہ تعالیٰ اپنی اطاعت سے نکل جانے والوں کے لئے سچائی کا راستہ نہیں کھولتا۔انہیں وہ راستے نہیں بتاتا جو انہیں فائدوں تک پہنچائیں یا انہیں جنت کی شاہراہ پر لے جائیں۔ (الألوسی: ۷؍۶۹)
سوال: آیت میں ہدایت اور توفیق ملنے کی راہ میں رکاوٹ بننے والی ایک چیز کا بیان ہے ۔اسے بیان کیجئے.