قرآن

اللہ تعالیٰ نے اپنی بادشاہت کو حق سے متصف کرکے اس بات کی طرف اشارہ کیا ہے کہ دوسرے دنیاوی بادشاہوں کی بادشاہت کمی،کوتاہی سے خالی نہیں ہوتی۔ (ابن عاشور: ۱۶؍۳۱۵)
سوال:بڑے ہی اختصار سے اللہ تعالیٰ کی بادشاہت اور دنیاوی بادشاہوں کی بادشاہت کے درمیان تین فرق واضح کیجئے.

اس آیت کریمہ سے حصول علم کا ادب اخذ کیاجاتا ہے: وہ یہ کہ علم کی سماعت کرنے والے کو چاہئے کہ وہ صبر اور اطمینان سے کام لے یہاں تک کہ معلم اپنے سلسلہ وار کلا م سے فارغ ہوجائے، پھر جب معلم اپنی بات سے فارغ ہوجائے تو اگر ذہن میں کوئی سوال ہے تو اسے کرے۔اثناء کلام معلم کی بات کو نہ کاٹے اور نہ ہی سوال کرنے میں جلد بازی سے کام لے کیونکہ یہ محرومی کا سبب ہوسکتا ہے۔ (السعدی؍۵۱۴)
سوال:ایک طالب ِعلم اس آیت کریمہ سے کون سا ادب سیکھتا ہے؟

چونکہ وحی کو اخذ کرنے میں آپﷺ کی عجلت اور اس کی طرف سبقت اس بات پر دلالت کرتی ہے کہ آپ علم کے ساتھ بڑی محبت رکھتے ہیں اور اس کے حصول کے بے حد حریص ہیں اسی لئے اللہ تعالیٰ نے آپ کو حکم دیا کہ اپنے لئے علم میں اضافہ کی دعا کریں۔ (السعدی؍۵۱۴)
سوال:نفع بخش علم کے حصول کے لئے وہ کون سا اہم وسیلہ ہے جس کا اس آیت میں ذکر ہے؟

ابن مسعود رضی اللہ عنہ جب اس آیت کو پڑھتے تو یہ دعا کرتے: "اللهم زدني علمًا وإيمانًا ويقينًا"میرے رب!میرے علم اور ایمان ویقین میں
اضافہ کردے۔ (البغوی: ۳؍۱۴۲)
سوال:اس آیت کریمہ پر غوروفکر کرکے ہم کیسے عمل کریں گے؟

اللہ تعالیٰ کے اس فرمان: (إن لك ألا تجوع فيها ولا تعرى)میں بھوک اور ننگا پن کی نفی کو ایک ساتھ ذکر کیا گیا جبکہ اللہ کے اِس فرمان: (وأنك لا تظمأ فيها ولا تضحى) میں پیاس اور بدن کی ظاہری تکلیف کی نفی کو ایک ساتھ ملا کر ذکر کیا گیا۔کیونکہ بھوک اور ننگے پن کے درمیان ایک خاص مناسبت پائی جاتی ہے وہ اس طرح کہ بھوک اندرون جسم کے اس خالی پن کو کہتے ہیں جس سے تکلیف ہوتی ہے اور یہ تکلیف کھانے سے دور ہوجاتی ہے۔اور ننگا پن ظاہر جسم کے اس خالی پن کو کہتے ہیں جس کی وجہ سے گرمی کی تپش اور سردی کی شدت تکلیف پہنچاتی ہے اور یہ تکلیف لباس سے دور ہوجاتی ہے۔
اسی طرح پیاس اور سورج کی گرمی کے درمیان ایک خاص مناسبت پائی جاتی ہے وہ اس طرح کہ پیاس اندرون ِجسم پائی جانے والی گرمی کی تکلیف کا نام ہے جبکہ سورج کی گرمی ظاہر بدن پر گرمی کی تکلیف کانام ہے۔ (ابن عاشور: ۱۶؍۳۲۲)
سوال:مذکورہ آیات میں بھوک کو ننگے پن کے ساتھ اور پیاس کو گرمی کی تپش کے ساتھ ملا کر کیوں ذکر کیا گیا؟

ابن عباس رضی اللہ عنہما نے فرمایا: جو قرآ ن کریم کو پڑھ کر اس پر عمل کریگا اس کے لئے اللہ تعالیٰ نے یہ ضمانت لی ہے کہ وہ دنیا میں گمراہ نہیں ہوگا اور آخرت میں نامراد نہیں ہوگا۔پھر انہوں نے یہ آیت کریمہ تلاوت کی۔(القرطبی: ۱۴؍۱۵۶)
سوال:کیا قرآن کریم کو صرف یاد کرلینا دنیا میں ہدایت اور آخرت میں نجات کے لئے کافی ہے؟

(اللہ کے ذکر سے اعراض کرنے والے کو )قلبی اطمینان اور شرح صدر نہیں ہوگا بلکہ ان کا سینہ گمراہی کے سبب نہایت تنگ ہوگا گرچہ وہ بظاہر نازو نعمت کی زندگی بسر کررہا ہو، کھانے،پینے،پہننے، اوڑھنے اور رہنے سہنے کی فراخی حاصل ہو لیکن دل میں یقین وہدایت نہ ہونے کے سبب ہمیشہ بے چینی حیرانگی اور شک وشبہ میں رہے گا اور یہی زندگی کی تنگی ہے۔ (ابن کثیر:۳؍۱۶۴)
سوال:کیا ظاہری نعمتیں باطنی سعادت پر دلالت کرتی ہیں؟آیت کی روشنی میں اس کی وضاحت کیجئے.