قرآن

تبدیلی کی اصل (اور حقیقت)یہ ہے کہ عالم کا علم اسی پر لوٹادیا جائے اور نیک آدمی کی نیکی اسی کی طرف پلٹا دی جائے، عالم کے علم پر عمل نہ کیا جائے اورنیک آدمی کی نیکی سے ہدایت ورہنمائی نہ لی جائے۔ (البقاعی:۱؍۳۹۰)
سوال: آیت میں نعمت الہٰی کی تبدیلی کی اصل کیا ہے؟

اللہ تعالیٰ نے اگرکسی شخص کو کوئی دینی یا دنیوی نعمت عطا کی اور اس نے اس نعمت کا شکر ادا نہیں کیا اور اس کے تقاضے نہیں نبھائے تو وہ نعمت چھن جاتی ہے اور کفر اور گناہوں سے بدل جاتی ہے۔اس طرح کفراس نعمت کا بدل بن جاتا ہے۔مگر جو شخص اللہ تعالیٰ کا شکر بجالاتا ہے اور نعمت کا حق ادا کرتا ہے تو اس کی نعمت قائم وبرقرار رہتی ہے اور اللہ تعالیٰ اس نعمت میں مزید اضافہ کرتا ہے۔ (السعدی:۹۵)
سوال: نعمت کیسے قائم رہتی ہے اور کیسے زائل ہوتی ہے؟

کفار،آپ کی تصدیق کرنے والے اہل ایمان کی ہنسی اڑاتے ہیں،اس بات پر کہ وہ دنیا اور اس کی زیب وزینت جیسے عمدہ لباس ،معاش اور مال ومتاع میں ایک دوسرے سے آگے بڑھنے اور فخر وزیادتی جتانے کے پیچھے نہیں پڑتے ،نہ ہی سرداری اور برتری کی چاہت میں گھلے جاتے ہیں۔بلکہ وہ (مومنین) دنیاکو تج کر اس کی زیب وزینت چھوڑکر میرے پاس موجود اجر وثواب کی طلب میں لگے رہتے ہیں۔ (الطبری:۴؍۲۷۳)
سوال: دنیا دارلوگوں کی نگاہ میں فلاح وکامیابی کے پیمانے کیا ہیں؟

عائشہ صدیقہ رضی اللہ عنہا سے روایت ہے کہ نبی ﷺ جب رات میں تہجد کی نماز پڑھنے کے لئے کھڑے ہوتے تو کہتے تھے : ‘‘اَللّٰہُمَّ رَبَّ جِبْرِیْلَ وَمِیْکَاءِیْلَ وَاِسْرَافِیْلَ ، فاطِرَ السَّمٰواتِ وَالْأَرْضِ، عَالِمَ الغَیْبِ وَالشَّہَادَۃِ أَنْتَ تَحْکُمُ بَیْنَ عِبَادِكَ فِیْمَا کانُوْا فِیْہِ يَختَلِفُوْنَ، اِھدِنِیْ لِمَا اخْتُلِفَ فِیْہِ مِنَ الْحَقِّ باِذْنِكَ ،اِنَّكَ تَہْدِیْ مَنْ تَشَاءُ اِلیٰ صِرَاطٍ مُّسْتَقیْمٍ’’۔(اے اللہ!اے جبریل،میکائیل اور اسرافیل کے رب!اے آسمانوں اور زمین کے پیدا کرنے والے!اے غیب اور ظاہرکو جاننے والے !تو ہی اپنے بندوں کے درمیان ان چیزوں کا فیصلہ کریگا جن میں وہ اختلاف کرتے ہیں۔تو اپنے حکم سے اس حق کا راستہ بتادے جس میں اختلاف کیا گیا ہے ۔یقیناًتو جسے چاہتا ہے سیدھے راستہ کی ہدایت سے نوازتا ہے)۔ (ابن تیمیہ:۱؍۴۹۳)
سوال: نبی ﷺ اختلافی معاملات میں اللہ سے ہدایت طلب کرتے تھے ۔آپ کی دعا کیا تھی؟

(أَمۡ حَسِبۡتُمۡ) کیا تم نے سمجھ رکھا ہے ۔ یہ حوصلہ افزائی کے طور پر مومنوں سے خطاب ہے اور انہیں مصائب اور سخت حالات میں صبر کرنے کی تلقین ہے۔(وَلَمَّا يَأۡتِكُم) یعنی تم جنت میں نہیں جاسکتے یہاں تک کہ تمہیں بھی ویسی ہی آزمائشیں اور سختیاں پیش نہ آجائیں جس طرح تم سے پہلے لوگوں کو پیش آئی تھیں۔ (ابن جزی:۱؍۱۰۷)
سوال:آپ نے آیت کا جو مطلب سمجھا ہے ، اس کی روشنی میں بتائیے کہ جنت میں جانے کی کیا شرط ہے؟

آیت میں اس بات سے آگاہ کیا گیا ہے کہ مشکل حالات میں جب اللہ کے علاوہ دوسرے تمام سہارے ٹوٹ جاتے ہیں۔تب اللہ سبحانہ وتعالیٰ اپنے انبیاء اور ان کے ساتھیوں کو غم سے راحت اور کشادگی دیتا ہے تاکہ ان کے دلوں کو تقویٰ کے لئے خالص کردے ، تاکہ ان کی نیتیں مخلوق میں سے کسی بھی چیز کی طرف مائل ہونے سے پاک ہوجائیں اور ان کے ضمیر اور دل اکیلے اللہ سے وابستہ رہیں۔ (البقاعی:۱؍۳۹۷)
سوال: اللہ کی مدد میں بسااوقات تاخیر کیوں ہوتی ہیں؟ آیت کی روشنی میں وضاحت کیجئے.

آیت کو علم کے ساتھ ختم فرمایا؛ اس لئے کہ خرچ کرنے کے عمل میں نیتیں خراب ہوجاتی ہیں اور ان میں خلل آجاتا ہے۔کیونکہ خرچ کرنا ایسا عمل ہے جس پر نفس سب سے زیادہ شدّ ومد کے ساتھ شیخی بگھارتا اور فخر وشان کا مظاہرہ کرتا ہے ،چنانچہ شاید ہی کوئی نفس اس سے محفوظ رہتا ہو۔صرف وہی بچتا ہے جس کا بایاں ہاتھ نہیں جانتا کہ اس کے دائیں ہاتھ نےکیا عمل کیا ہے۔ (البقاعی:۱؍۴۰۰)
سوال:آیت کو اللہ تعالیٰ کی صفت علم سے ختم کرنا کس بات پر دلالت کرتا ہے؟